ICC thupek zawm loin Sudan President a haw

South Africa-a African Union (AU) summit hmanga kal, Sudan President Omar al-Bashir chu International Criminal Court (ICC)-in South Africa chhuahsan lo turin ti mah se, Thawhṭanni khan an ramah a haw lui.

Sudan tualchhung buaina thlengah mi tam tak thihnaa inhnam­hnawiha puh a nih avangin ICC chuan Sudan President hi man nghal turin South Africa a ngen a ni. Mahse ICC ngenna hi SAfrica chuan a zawm duh lo a, Bashir hi lawm takin a lo dawngsawng a ni. South Africa-a rorellai, African National Congress chuan AU sum­mit hmang tura kalte chu man an nih theihna laka hum an ni dawn tih a sawi.

AU summit zawh hnuah, Thawhṭanni khan South Africa-a Pretoria High Court chuan Sudan President hi an ram chhuahsan lo tura hriattirin, manna tur thupek a tichhuak a ni. Mahse court thupek tihchhuah a nih hnuah Bashir hi an ramah a haw lui ta tho a ni.

Sudan khawpui, Khartoum airport-ah Sudan mi tam takin an President hi an lo hmuak a, a lo hmuaktute zingah First Vice President Bakri Hassan Saleh leh sorkar senior official ṭhahnem tak an tel. Sudan sorkar chuan 'Sudan leh Africa hmelmate'n' South Africa-a Bashir man an tumna chu a tlawlh tiin a sawi.

Africa ram hruaitute leh ICC inkar boruak hi kum 2013 aṭang khan a ṭha lo chho hle a, Africa ram hruaitute chuan an khawmual mite chu ICC hian a bitum bik tiin an puh. Kum 2013-a Addis Ababa-a AU summit neih a nih ṭum pawh khan Ethiopia Prime Minister Hailemariam Desalegnchuan ICC chu Africa hruaitute hrem tuma um rengah a puh tawh a ni.

ICC hian kum 2009 leh 2010 khan Bashir-a manna tur thupek hi a lo tichhuak tawh a ni. Darfur biala buaina chhuaka mi tam tak thihna leh tihnawmnahna thlenga a bultumtuah a puh a, mahse court puhna hi Bashir chuan a pha thung. Darfur biala buaina chhuak vang hian mi 300,000 an thi a, mi maktaduai 2 vel hmun him lamah an tlanchhia tiin United Nations chuan a tarlang.