Morsi-a dam chhung a tang dawn

Egypt Court chuan an ram President hlui, Mohamed Morsi chu Palestinian Islamist group, Hamas leh Lebanon helpawl, Hezbollah bakah Iran tana enthlatua puh­na thubuaiah dam­chhunga tang turin nimin khan a hrem.

Morsi leh a thu­rual­pui nia sawi, mi 13-te chu kum 2005 leh 2013 inkar khan an ram thuruk pawi­mawh eng emaw zat rampawn lam mite hnena hrilhah puh an ni.

Hetihlai hian Mor­­si leh midang 100 chuang chu kum 2011-a Egypt Presi­dent aṭanga Hosni Muba­rak paihthlak tuma beih ṭuma tanin aṭanga tlanchhuah chung­changah thu­buai hran siamsak an ni bawk.

Egypt ramah hian damchhung tang tura hremte hi kum 25 chhung tantir an ni ṭhin. Nimina Morsi-a hremna pek hi court sang zawkah a khing let leh thei a ni.

Mipuiten an ram hruaitu atana an thlan chhuah hmasak ber, Mohamed Morsi hi kum khat chauh ro a rel hnuah, kum 2013 July thla khan mi­puiten bang tura phut­in nawrh an huai­hawt a, hun rei tak nawrh huai­hawt a nih hnuin sipai chakna hmanga paih­thlak a ni. Paih­thlak a nih hnu hian thubuai hrang hrang siamsak zui a ni a, amah paihthlak tuma nawrh huaihawtte kut­­thlaknaa mawh­phur­tua puhna thu­buaia kum 20 tang tura hrem a lo ni tawh bawk.