IS firfiakte kut aṭangin Tal Abyad khua lalet

Islamic State (IS) firfiakte kut aṭangin Syrian Kurdish fighter-te chuan Tal Abyad an lalet a, firfiak pawlte supply lakna kawngpui pawimawh ber pawh an kharsak nghal.

Turkey ramri bula awm, Tal Abyad laklet tum hian Kurdish fighter, Kurdish Popular Protection Units (YPG)-te chuan firfiakte hi an bei a, an inbeihna avangin civil mi tam tak chu Turkey ramah an tlanchhia. YPG hi Syria helpawl te'n an puih bakah, US kaihhruai ṭangrual pawlte'n thlawhtheihna hmanga beihpui thlakin an lo pui bawk.

YPG commander, Huseyin Kocher chuan khawpui pum hi an kutah a awm tawh tih a sawi a, Syria hmarlama IS-te ram luah pawh lakkir leh vek an tum tih a sawi.

Tal Abyad khawpuia Kurdish fighter leh firfiakte inbeihna avanga hlaua tlanchhia, civil mite hi Turkey-ah luh an tum a, mahse hun eng emaw chen chu ramri hungna khar a nih avangin an tangkhang. Pathianni chawhnu lam khan ramri hungna hmun ṭhenkhat chu zaihawngin Turkey ramah hian an lut a ni. Turkey ramah hian Thawhṭanni thleng khan raltlan mi 3,000 vel an lut tawh a ni.