Russia President Putin-a'n kar leh aṭangin Covid vaccine sem chhuak turin ti

Russia President Vladimir Putin chuan an ramin Covid-19 vaccine a siam, Sputnik V vaccine chu kar leh aṭanga hmang ṭan turin thupek a tichhuak. Sputnik V vaccine hi dose maktaduai 2 dawn an siam tawh niin an sawi. 

Russia hian kar liam ta khan Sputnik V vaccine hi enchhinna aṭangin 95% in a rintlak niin a lo sawi tawh a, ram dang vaccine siam mek aiin a rintlak zawk niin a sawi. Soviet Union hun laia an satellite hming chawia phuah, Sputnik V vaccine hi mihringa enchhinna phase tawp ber neih mek a ni a, volunteer 40,000 velah enchhin a ni. 

Vladimir Putin chuan coronavirus task force hotu, deputy prime minister Tatiana Golikova nena video conference an neihnaah, kar leh aṭanga vaccine semchhuah chu kalpui a nih theihna tura ruahmanna siam turin a ti a ni. President chuan zirtirtute leh damdawi lama thawkte chu vaccine pek hmasak an nih tur thu a sawi bawk. 

Sputnik V vaccine hi Russia mipuite hnena a thlawn veka sem a ni dawn a, vaccine lak duh leh duh loh chu mimal duhthlannaa dah a ni bawk a ni. Health minister Mikhail Murashko chuan mi nuai khat chuang chu vaccine hi pek an lo ni tawh niin a sawi. 

Russia hi khawvela Covid-19 kai hmuh chhuah tamna ram palina a ni mek a, mi maktaduai 2.3 in hri hi an kai tawh a, an zinga 41,000 in an thihpui tawh bawk. Mahse November 27 hnu lam aṭang khan hri kai punna hi a tlahniam ṭan tawh nia sawi a ni. 

Zimbabwe sorkar chuan an ramah Covid-19 kai an pun chak leh avangin hri darh tur venna atana khuahkhirhna khauh zawk a siam thar leh. Information minister Monica Mut­svangwa chuan punkhawmna hmun buatsaihah awm thei zat chu 100 chinah tihtlem a ni tih sawiin, mipuite chu sorkari n hri darh tur venna atana kaihhruaina a siamte zawm ṭha turin a ngen. 

Zimbabwe sorkar hian March thla khan  hri leng vang hian ram pumah lockdown a puang a, mahse hri kaiin ziaawm lam a pan hnuah khuahkhirhnate hi a thlahdul ṭan tawh a ni. Mahse tun hnaiah hri kai an pung chho leh a, November 9 aṭanga school hawn a nih hnuah school naupang zingah hri kai pawh an pung leh nasa hle. 

US sorkar chuan Covid-19 kai nena inhnimhnaihna nei, fimkhur thila ni 14 chin inkhunghrang tura  tih ṭhin chu symptom an neih loh a, test result a negative chuan an inkhung hun chu ni sarihah a tihtawi sak. 

Centers for Disease Control and Prevention (CDC) chuan quarantine hun tihtawi hian mi tam tak harsatna a tihtlem phah thei tih sawiin, hun rei tak hna thawk thei loa inkhung tir chuan an sum zawnna kawng thlengin a nghawng a ni, a ti. Hei vang hian an harsatna tawhte hi tlem tala chhawk zangkhai theih a nih beiseiin, mipui lam pawhin dante an zawm ṭhat phah ngei an beisei tih a tarlang. 

US President-elect Joe Biden chuan America mipuite chu an ramah hri kai an pun belh zel avangin holiday season-ah pawh zin chhuak lo turin a ngen. 

Biden chuan hri darh tur venna atana hmalaknate chu mipui lamin an ngaihven ṭhat tawk loh avangin Krismas chho pawh a huphurhawm dawn hle tih sawiin, thla reiloteah Covid-19 vanga nunna chan hi 2,50,000 vel an awm belh leh mai a hlauhthawnawm hle a ni, a ti. 

"December, January leh February thlate hi hun khirh tak a ni chho dawn a ni, kan ram public healht dinhmunah  hun harsa ber tur niin a lang," tiin Biden chuan a sawi. Nilaini khan US-ah hian Covid-19 kai vanga damdawi-ina dah luh ngai hi mi nuai khat an chuang tawh a, hei hi an rama hripui a len  hnuah damdawi-ina enkawl an la tam ber lai a ni tih Covid Tracking Project chuan a tarlang. Johns Hopkins University-in a tarlan danin, US-ah hian hri kai hmuh chhuah tawh hi mi maktaduai 14 dawn an tling tawh a, an zinga 2,73,000 in an thihpui tawh a ni.