Israel-in Palestinian tax fund pe chhuak

Israel sorkar chuan hun rei tak a hren khawtlai sak tawh, Palestinian tax fund chu  Nilaini khan a pechhuak ta. 

Kum 1990 chhoa inremna lailawk an lo siam tawh angin, Israel hian Palestinian hnenah hian tax fund hi thla tinin a pe ṭhin a ni. Mahse ram pahnihte inkara inhriatthiam lohna awm avangin hun eng emaw chen chu a sum pek tur hi a hren sak a, hei vang hian PA pawhin harsatna tawkin hnathawktu mi 1,30,000 te hlawh pawh hun eng emaw chen chu a pe mumal thei tawh lo a ni. Prime minister Mohammad Shtayyed chuan tax fund an dawn hunah hlawh hi an pe thei dawn chauh tih a lo sawi tawh a ni. 

Palestinian civil affairs minister Hussein al-Sheikh chuan Nilaini khan Israel sorkarin a sum hrensak te a pek tlak tak thu hi sawiin, a vaiin shekels tluklehdingawn 3.76 chuang (US dollar tld 1.14) a pe tih a sawi. May thla khan Palestinian president Mahmoud Abbas-a'n Israel-in an ram a luahsak, West Bank-a Juda chenna tur hmun siam belh a tum avangin Israel hi an thawhpuina an tihtawp thu a sawi a ni. Mahse Israel hian United Arab Emirates (UAE) nena thawhdunna inrema peng pakhat an siam angin West Bank-a ram zauh a tumna hi titawp rih a, hei vang hian November thla khan Palestinian lam chuan civil leh security lama Israel nena an thawhdunna chu an chhunzawm leh tih a sawi.Hei vang hian Israel pawhin Palestinian Authority hnena a sum pek tur a hrek sak chu a pechhuak leh ta a, hei hi June thla hnua a pekchhuah hmasa ber a ni. 

Israel-in Palestinian ram a luah, West Bank-a roreltu, Palestinian Authority chuan Israel sorkar aṭanga tax fund a dawn hi a sum hmuhna pui ber a ni. Tax fund a dawn thin hi an budget zahve ai pawhin a tam zawk ṭhin. Coronavirus leng vang leh, Israel-in hun rei tak sum a hreksak bawk avang hian harsatna pawh an tawh zual phah hman hle a ni.