Thla 13.5 tang turin Joshua Wong hrem

Hong Kong pro-democracy activist Joshua Wong, Anges Chow leh Ivan Lam-te chu nikuma city police headquarters bula phalna nei loa nawrh huaihawta puh chungchangah jail tang tura hrem an ni. 

Kum 24 mi, Joshua Wong chu thla 13 leh a chanve tang tura hrem a ni a, Chow (23) chu thla 10 leh Lam (26) chu thla sarih tang turin court chuan a hrem. 

Nikum June 21 khan Hong Kong police headquarters bulah sorkar laka lungawi lohna lantira nawrh huaihawtte chunga police-te chet dan duh lohna lantir leh, extradition bill duh lohna lantirin an pungkhawm a ni. He punkhawmna huaihawttua puh, Joshua Wong, Chow leh Lam-te chu thubuai siamsak an ni. 

Court-in hremna a tihchhuah hi Britain foreign minister Dominic Raab chuan sawisel nghalin, Hong Kong leh China sorkar chu eptute rahbeh an tumna titawp  turin a phut. US Senator Marsha Blackburn pawhin China chu human rights palzutah puhin, Hong Kong-a sorkar laka lungawi lohna lantira punkhawmte tihchhiat zel tumah a puh bawk. Thuchhuah siamin, Blackburn chaun Joshua chu chak taka awm zel turin a chah a, hmun hrang hranga zalenna sualtute fuihtu leh phurna petu a nih thu a hrilh. 

Amnesty International-a Asia-Pacific Regional director Yamini Mishra pawhin  court rorelna chu sawiselin, Hong Kong thuneitute chuan sorkar sawisel tawh phawt chu a bitum zel a ni, a ti. Hong Kong sorkar hian tun hnaiah legislature-a eptu member-te chu a lo hnawtchhuak tawh a, inthlan neih turah pawh pro-democracy candidate-te a hnawl bawk.