Turkey court-in Gulen manna thupek tichhuak

Turkey court chuan US-a awm, Muslim sakhaw rawngbawltu Fethullah Gulen-a manna tur thupek a ti≠chhuak. July 15-a Turkey sipai
ṭhenkhatin sorkar paihthlak tuma an beihnaah Gulen hi a inhnamhnawih niin Turkey sorkar chuan a puh a ni.

Sorkar news agency, Anadolu chuan Ningani khan Istanbul-a court chuan Gulen manna tur thupek hi a ti≠chhuak tih a sawi.

Sorkar chuan President Recep Tayyip Erdogan-a thawhpui ṭhin, tuna himna zawnga US-a tlanchhe mek, Gulen hian sorkar paihthla tur sipai officer
ṭhenkhatte fuih ṭhinah puh a ni a, a chungthu ngaihtuah a nih theih nan Turkey rama thawn turin US sorkar pawh a lo ngen tawh a ni.

Mahse Gulen chuan Turkey sorkar paih≠thlak tuma beihnaah hian inhnamhnawihna a neih loh thu leh, he chanchin pawh hi a hmaa engmah a lo hriat lawk loh thu a sawi. Turkey sorkar chuan President Erdogan leh prime minister hlui Ahmet Davutoglu-te inbiaka lo record ruk chungchangah Gulen manna tur thupek hi a lo tichhuak tawh bawk a ni.

Turkey sorkar paihthlak tumnaa inhnamhnawihte dapchhuah beihpui thlak chu chhunzawm zel a la ni a, mi 26,000 vel man an ni tawh a, an zinga tam tak hi sipai an ni. Hei bakah hian sorkar hnathawk mi 70,000 vel suspend leh ban an ni tawh bawk.

Rorellai, Jutice and Development Party deputy chairman Medi Eker chuan ram hrang hrangte pawhin Gulen-a nena inthlunzawmna nei school, charity leh sumdawnna thilte chu an enfiah a, action an lak a ngai a ni, a ti. Ram 100 chuangah Gulen-a pawlte hian school leh charity-te an nei tih sawiin, heng ramte hian an himna tur an ngaihtuah a ngai a ni, a ti.

US Secretary of State John Kerry chuan tun thla chhung hian Turkey ram tlawh a tum a, hei hi Turkey sorkar paihthlak tum a nih hnua khawthlang ram hruaitu pawimawhin an tlawhna hmasa ber tur a ni ang.