Nepal PM thar la an lut

Nepal Prime Minister atana thlan thar, CPN-Maoist (Centre) hotu Pushpa Kamal Dahal, Prachanda tia hriat lar chu Ningani khan Nepal PM 39-na ni turin lakluh a ni a, hei hi PM a nih ṭum hnihna a ni.

Prachanda hi President Bidya Devi Bhandari chuan rinawmna thu tiamtirin a la lut a ni. PM rual hian a minister turin mi panga, Nepali Congress member pahnih leh Maoist party member pathum an ni. Nepali Congress senior politician Bimalendra Nidhi chu deputy prime minister atan dah a ni.

Kum 2008-a PM atana lakluh a nih khan Prachanda hian rinawmna thu a tiamah Pathian hming a tlam tel duh lo a, an ram hming leh mipuite hmingin rinawmna thu a tiam a ni. Mahse tun ṭumah chuan Pathian hming a lam tawh a ni.

PM lakluh inkhawm hi Vice-President Nanda Bahadur Pun, PM kalchhuak KP Sharma Oli, Chief Justice Sushila Karki, Speaker Onsari Gharti, prime minister leh minister hluite bakah, political party hruaituten an telpui.

July thla khan KP Sharma Oli chuan PM a nihna aṭang hian banna a thehlut a, amah thlaktu tur thlan dawnah Prachanda chauh hi nomination thehlut a awm a ni. Parliament-a vote laknaah member 595 zinga 363 in an thlawp a, member 210 in an thlawp lo thung a, mi 22 in vote an thlak lo.