Hamas tana World Vision sum pawtpengah puh

Israel chuan Gaza-a international charity, World Vision hotu chu charity ṭanpuina tura ramdang aṭanga sum an hmuhte Palestinian firfiak pawl, Hamas tana pawtpengah a puh.

Shin Bet security service chuan World Vision charity-in Gaza tana sum a thawn zinga 60% chu Islamist firfiak pawl tan hian lakpen a ni tiin, Gaza-a charity hotu Mohammad Halabi pawh hi Hamas-ten kum sawm chuang liamtaa an dah niin a sawi.

World Vision chuan Gaza programme chu an audit ziah thu leh, Israel-in a puhna chu mak a tih thu a sawi. Mahse thil awmdan chu an chhuichiang dawn tih sawiin, dik lo taka thiltih a awm ngei tih finfiahna awmte an zirchiang a, a ṭul angin action pawh a la dawn tih a sawi.

Hamas hi Gaza Strip-ah ro an rel mek a, mahse Israel , US, EU leh UK bakah ram dang ṭhenkhat chuan firfiak pawlah an puang a ni.

Hamas thupuangtu, Sami Abu Zuhri chuan Israel thusawi chu a dik lo tih sawii, "Charity hotu Halabi leh kan pawl hian inzawmna kan nei lo a, hei vang hian Israel thusawi hi thu dik lo, kan mite rahbeh an tumna mai a ni" a ti. Hun rei tak chhung Hamas leh Israel sipaite inbeiha avangin Gaza Strip-a chengte hi dinhmun harsa taka dingin, mi tam tak chu ramdang chhawmdawlna pekah an innghat a ni.

Israel chuan Halabi hi June thla khan Erez ramri-ah man a ni a, firfiakte
ṭanpuina sum pea puhin thubuai siamsak a ni, a ti. Hamas tana sum a pawhpe sak hi kum khatah dollar maktaduai 7.2 vel a tling a ni, a ti.

Shin Bet chuan Halabi hian loneitu leh rualbanlote chhawmdawlna tur project lem siamin, hetah hian Hamas member te chu hnathawktu niin a ziak lut a, charity sum chu tam tak an pawhpen sak a ni, a ti. Sum an pawhpente hi Israel mite beihna atana ramri kaltlangna tur leiverh siamna atan te, rualthuam leina leh an pawl hmunpui thuam chakna atante an hmang niin a tarlang.