Thailand mipuiten vote an thlak

Thailand-a sipai kaihhruai sorkarin an ram danpui thar tur a siam chungchangah nimin khan ram mipuite ngaihdan lak a ni.

Danpui thar duangtu, sipaite chuan ram danpui thar hi kum 1930-a lal thuneihna pumhlum tihtawp a nih hnua, ṭum 20 an siam ṭhatna a ni tih an sawi a, he dan thar hmang hian politics lama eirukna tihbo a ni dawn a, an ramah boruak ralmuang leh ngialnghet a awm theih nan a pawimawh tih an sawi. Mahse sawiseltu lam chuan danpui thar siam hi sipaite thuam chakna tur hmanrua niin an sawi thung.

Zing dar 8 aṭangi mipute vote an thlak ṭan a, hei hi kum 2014-a sipaiten mipui thlan sorkar an paihthlak hnua vote an thlak lehna hmasa ber a ni.

Eptute chuan sipai siam ram danpui thar hi pawm a nih chuan, an ram politics-ah sipaite hmun pawimawh tak an chhang chho zel dawn niin an sawi.

Mipui tam tak chuan vote thlak hma hian danpui duan thar hi eng ang nge tih pawh an hre lo a, sipai sorkar chuan a dodal zawnga campaign a khap bawk. Mipuite hnenah a thlawp lo zawnga vote thlak tura fuiha leaflet semchhuaktu activist leh politician eng emaw zat man an ni bawk.

Sipai sorkar chuan danpui siam thar hi mipuiten an pawm a nih chuan nakkumah an ram inthlanpui buatsaih an tiam a, mipui thlan chhuah sorkar a din leh tur thu an sawi. Mahse sipaite hian sorkar thar a din hunah pawh chanvo an neih chhoh zel rin a thung.

Mipuiten duh an thlan turah hian ram danpui thar tur duan chu an pawm nge pawm lo tih te, prime minister thlan turah upper house, senate telh an remti em tih a ni. PM hi lower house-in a thlan ṭhin a ni.

Danpui siam thar hian an ramin politics lama buaina a tawk a nih chuan mipuiten an aiawh tura an thlanchhuah ni kher lo pawh prime minister-ah dah theih a ni dawn a, senate member 250 chu sipaiin a ruat ang a, seat paruk chu sipai tan bik dah a ni bawk ang. Senate hian sorkar chungah thuneihna sang tak a nei dawn a, sorkar kalphungte enfiahin politician-te thuthlukna pawh a lo dang thei dawn a ni.