China leh Pakistan-in military deal ziak
China leh Pakistan chuan an sipaite thawhdunna tur, military memorandum of understanding an ziak.
China defence minister leh People's Liberation Army (PLA) general Wei Fenghe chu Pakistan ramah zinin, Rawalpindi-a Pakistan army headquarters pawh a tlawh nghal a ni. Pakistan president Arif Alvi leh prime minister Imran Khan-te kawmin, Gen Wei chuan China leh Pakistan chuan sipai thawhdunna nghet leh zau zawk an neih a ṭul thute a sawipui. Pakistan Army chief genreal Qamar Javed Bajwa nen General Headquarters-a meeting an neihnaah ram pahnih sipaite thawhdunna tur inremna hi an ziak ta a ni. Inremna an ziah dan erawh kimchanga puanzar a ni lo.
China Defence Minister hian Pakistan Joint Chiefs of Staff Committee chairman general Nadeem Raaza pawh a kawm bawk. Pakistan president Arif Alvi chuan South China Sea, Taiwan, Xijiang, Tibet leh thil dang chungchangah Pakistan chuan China chu a thlawp tlat tih a sawi a, ram pahihte chuan defence leh security field-a an thawhdunna te chu an tihchak chhoh zel a beisei thu a sawi. Prime minister Imran Khan pawhin Pakistan leh China chuan inlaichinna leh thawhdunna ṭha zawk an neih zel a beisei thu a sawi.