Hiroshima bomb champha pualin inkhawm buatsaih

Kar kalta Inrinni khan Indopui II hunlaia US sipaiten atom bomb hmanga Hiroshima khawpui an beih champha vawi 71-na a ni a, hemi pual hian inkhawm buatsaih a ni.

Hiroshima Peace Park-a hriatrengna inkhawm buatsaihah hian mi 50,000 vel an tel a, US sipaiten atom bomb an thlak hun, an ram sanaa zing dar 8.15-ah ngawi rengin minute khat an ding a, remna dark vuak a ni bawk.

Inkhawm buatsaihah hian Hiroshima Mayor Kazumi Matsui chuan thu a sawi a, atom bomb thlak avanga thi chhungte an tuarpui takzet a, khawvela remna tluangtling a awm theih nana nuclear ralthuam awmte tibo vek turin theihtawp an chhuah zel dawn tih a sawi. Inkhawmah hian ram 91 aiawhte an tel a, an zingah hian nuclear power ram - US, Britain, Russia leh France aiawhte pawh an tel.

Hiroshima khuaa atom bomb thlak vang hian mi 1,40,000 chuang an thi a, a hnu August 9-ah Nagakasi khawpuiah bomb hi thlak leh a ni bawk. Atom bomb hmanga beih a nih vang hian Indopui II-naah Japan ram hi a tlawm phah a ni.