Palestinian mi tangten chaw nghei titawp

Israel rama Palestinian mi tang 200 chuangten chaw ngheia nawrh an huaihawt chu Israel thuneitute nena inremna an siam theih tak avangin an titawp ta.

Gaza-a Prisoner's Media Office chuan inremna an siam theih tak thu hi sawiin, tangten an thil phut zingah hian thawmhnaw phelha indap leh an taksa dap sak tihtawp te, tan in-ah boruak luhna ṭha zawk siam leh, cell tawt lutuk tihziaawmte a tel.

Israel thuneitute chuan tun hnaiah tan-in chhungah Palestinian firfiak pawl, Hamas pawl nena inkungkaihna nei dapchhuah hna an thawk a, tangte chu an cell aṭanga hruai chhuakin an thawmhnaw phelhin an dap a, hei bakah hian kutte an thlak tel bawk niin Palestinian Prisoners' Center for Studies director Osama Shaheen chuan a sawi. Israel Prison Service chuan tan-ina tang zinga pawikhawihn thlen tuma hmalakna a awm nia thu an dawn vangin Hamas mi leh sate bik dapchhuah hna an thawk a, an cell-te endikin mobile phone-te a man niin an sawi thung. Tang ṭhenkhatte pawh an tanna hmun sawn niin,an zingah hian Higher Commission of Hamas Prisoneres hotu Muhammad Arman pawh a tel a ni.

Palestinian tangte leh Israel thuneituten inremna an siamah hian tan an sawnchhuahte pawh a tira an tanna jail-a dahkir leh vek pawh a tel a, tang intlawh theih hunah an chhungte an chhiar tur lehkhabu kensak phalsak an phut tel bawk. Inremna hi siam mah se, engtik aṭangin nge hman tur tih erawh tarlan tel a ni lo.