Duterte-a'n ruihhlo hmanga sumdawnnaa inrawlhte hming puang

Philippines President Rodrigo Duterte chuan ruihhlo do beihpui thlak hna a kalpui chhunzawm zel a, nimin khan Davao khuaa sipai hmunpui a tlawhnaah dik lo taka ruih≠hlo hmanga sumdawnnaa inhnamhnawiha puh, sorkar mi pawimawhte 160 hming a puang.

An ram tichhetute tia Duterte-an a hming a chhiar chhuah zingah hian mayor leh executive hlui te, judge leh police-te an tel.

May 9-a President atana lak luh a nih khan, Davao city mayor hlui Duterte hian an rama ruihhloa sumdawng ṭhinte nuaibo a, pawikhawihna thleng ṭhin tihbo tura beih a lo tiam tawh a ni.

Duterte chuan list-a hming chuangte chungah eng angin nge action lak a ni dawn tih a la sawi lo a, hetihlai hian he list-a tel, Iloilo leh Bulacan mayor-te chu police kutah an inpe a, ruihhloa sumdawnnaah inhnamhnawhna an nei lo tih an sawi.

Kar kalta Zirtawpni khan Muslim bial, chhim lama Mindanao thliarkara mayor pathum pawh list aṭanga an hming paih a nih theih nan police kutah an lo inpe tawh a, thil dik lo tihnaa an tel loh thu leh, mi dik lote manchhuah an nih theih nana thuneitute an thawhpui zel tur thu an sawi.

Duterte chuan ruihhlo do beihpui thlakna atana a thuchhuah a lo siam tawh, an mi man tumte an lo ṭang a nih chuan kap mai tura thupek a siam, 'shoot to kill' thupek chu a sawinawn leh. An rama ruihho hluar tihtawp tura beihpui an thlakna kawnga thisen chhuahna thlengah pawh mawh a phurh vek tur thu a sawi bawk.

President thar lakluh a nih hnu, June 30 aṭanga ruihhlo do beihpui thlak a nih aṭang khan police-te chuan ruihhlo-a sumdawnnaa inhnamhnawiha puh mi 770-800 vel an kaphlum tawh a ni.