Tibet-ah lirnghing vangin mi 95 thi

Tibet-ah nimin, January 7, 2025 khan magnitude 7.1 a nain lir a nghing, lirnghingin chhiatna a thlenah mi 95 an thi a, hliam 130 vel an awm bawk. Lirnghing hi Nepal, Bhutan leh India-ah pawh an hria a ni.

Regional disaster relief headquarters in a tarlan danin, China-a Tibet Autonoumous Region-ah Dingri County-a Shigates khuaah an ram huna zing dar 9:05 khan a lir hi a nghing a ni. Hei hi Nepal-Tibet ramri bul, Lobuche aṭanga hmarchhak lam km 93 vel a ni. A epicenter hi India leh Eurasia plate inkar vel nia sawi a ni.

Nimina lirnghing hi helai biala kum nga chhunga lir a nghin nat ber ṭum a ni. Kum 2015 khan Nepal-ah magnitude 7.8-a naa lirnghing vangin mi 9,000 dawn an thi a, hliam tuar 22,000 chuang an awm. Chenna ni nuai nga chuang a chhe bawk a ni.

Shigatse khawpui hi Tibet rama khawpui pawimawh zinga mi niin, Tibetan Buddhism-a dinhmun pawimawh, Dalai Lama hnuai chiaha mi, Panchem Lama awmna hmun a ni. Lirnghin hian in tam tak a sawi chim a, in chim hnuaia tang hi eng emaw zat an la awm nia rin a ni bawk.

China president Xi Jinping chuan lirnghing tuarte chhanchhuah hna chu ngawrh taka thawh a ni dawn tih sawiin, lirnghingin an in a sawi chhiat sakte pawh khawvawt tak kara an awmna tur hmun him leh lum ṭha tak ngaihtuahsak an ni dawn tih a sawi. In chim hnuaia tangte zawn hna thawk tur hian fire leh rescue worker 1,500 vel tirh an nih thu Ministry of Emergency Management chuan a tarlang.