US-in China military company list-ah Tencent telh

United States chuan China technology company eng emaw zat chu China sipai thawhpuitu list-ah a dah belh. Heng zingah hian gaming and social media company lian, Tencent leh battery siamtu CATL pawh an tel.

US hian list a siam hi American company leh organisation-te warning a pekna atana a hman niin, heng list-a awm China pawl leh company-te thawhpui a hlauhthawnawm thu a hriattirna a ni. List-a telh an nih avang hian an rama hna an thawh leh lak luh khap tihna a ni lo a, mahse khap turin US Treasury Department an nawrna pawimawh tak a ni thung.

Tencent leh CATL chuan US puhna hi phain China sipai an thawhpui lo tih an sawi a, China sorkar pawhin US thiltih dan chhan felfai awm loa China company-te hrekbeh a tumna a ni, a ti.

Department of Defence in China military compnay list a siam hi Section 1260H list tia sawi a ni a, kumtinin a ennawn ṭhin a, kuminah hian firm 134 an tel a ni. Hei hi China-in an rama fim-te technology hmanga China sipai thuam chak a tumna, a lo do letna atana a tih a ni.

Tencent company thupuangtu chuan, "Military company emaw, supplier emaw kan ni lo. He list-a telh kan nih vang hian kan sumdawnna lamah nghawng a nei lo ang," a ti. CATL pawhin list-a telh an nih chu tihsual nia sawiin, eng thilah pawh sipai nena thawhhona an nei lo tih a sawi ve bawk.