Israel-in Syria-a khaihlum Mossad spy ruang lak kir tum thar leh

Israel sorkar chuan Syria president aṭanga Bashir al-Assad paihthlak a nih tak hnuah, kum 1965-a Syria-a Mossad spy khaihlum, Kamel Amin Thaabet, a hming tak Eli Cohen ruang lak kir tumin hma a la thar leh.

Eli Cohen hi kum 1962 khan sumdawng, Kamel Amin Thaabet intiin Syria khawpui, Damascus-ah a lut a, party lian tak tak buatsaihin khawpuia mi pawimawh zingah a lang a, Syria rama thiltithei zingah a tel chho a ni. Mahse kum thum hnu, kkumm 1965 khan Syria intelligence chuan Soviet Union puihnain radio hmanga Israel a biakna chu an man fuh a, a chenna in dapin an man a, a hming pawh Eli Cohen niin Israel spy agency, Mossad tana thawk tih an hrechhuak ta a ni. Ram hrang hrangten a laka zahngaihna lantir tura an ngen chungin Damascus khawpui laili lai, Marjeh Square-ah May 18, 1965 khan khaihlum a ni ta a ni.

Israel chuan an ram tana spy ropui ber zinga mi, Cohen ruang lak kir tum hian theihtawp a chhuah a ni. Cohen enthlak hna thawh hi Israel-in 1967 Six-Day War a hnehna a chan theihna atan pawh khan a ṭangkai hle a ni. Colen ruang an phumna hi hriatchhuah tumin an bei a, mahse Syria sorkar chuan an hriatchhuah hlauin an phumna hi vawi tam tak an sawn. Israel-in a ruang lak kir a nih theihna atana an rama Syria mi tang eng emaw zat chhuah a remtih thu a sawi pawhin Assad kaihhruai sorkar khan Israel rawtna hi an hnawlsak zel a ni. Kum 2018 khan Mossad chuan Syria aṭangin Cohen-a sana chu an la chhuak a ni.

Syria President aṭanga Assad paihthlak a nih tak avangin Israel chuan Cohen ruang lak kir tumin hma a la thar leh. Israel official-te chuan Assad-a thawhpui ṭhinte an be leh mek nia sawi a nia , Israel aiawh zingah hian Mossad director David Barnea pawh a tel. He inbiakna hi Russia palaina hnuaiah an nei nia sawi a ni bawk.