Los Angeles-ah ram kang vangin emergency puang

Los Angeles, US-ah an ram huna Thawhlehni khan ram a kang a, mi 30,000 vel sawnchhuah an ni tawh. Ram kang vang hian state of emergency puan a ni.

Santa Monica leh Malibu inkar, Pacific Palisades-ah ram kang hi thlengin, ram acre 2,921 vel a kang chhe tawh niin official-te chuan an sawi. Hetih lai hian thli chak taka a tleh tel avangin kang ṭhelh hna pawh thawh chak a har hle. An ram huna Thawhlehni chawhma dar 10:30 vel khan kangmei hi chhuak ṭanin, khaw ro leh thli tleh nen a kangkai chak hle. Chenna in ṭhenkhat pawh a kang chhia a, mahse thi leh hliam tuar erawh an awm lo.

Los Angeles Fire hotu, Kristin Crowley chuan mihring hliam leh thi an awm lo chu a vanneihthlak hle tih a sawi a, hemi rual hian chenna in 10,000 vel chu an dinhmun a him lo tih a sawi. Kangṭhelhtute chuan thlawhtheihna hmangin ram kang hi an ṭhelh a, kawngpuia motor tlansante pawh bulldozer hmangin emergency vehicle kal theihna turin thenfai an ni.

US vice president Kamala Harris chuan kangmei chhuak ṭhelhna senso leh harsatna tawkte ṭanpuina tur chu federal fund aṭanga pek a ni dawn tih a sawi. California governor Gavin Newsom pawhin Los Angeles County-a ram kang ṭhelhna tur hian Federal Emergency Management Agency aṭangin Fire Management Assistance Grant an dawn thu a sawi ve bawk.

Los Angeles-ah mi 200,00 vel chuan power supply an nei lo a, school eng emaw zat khar a ni bawk. California chhim lam bialah reld flag alert tih chhuah a ni. California Fire chuan mipuite chu fimkhur tura chahin, kangmei ti chhuak thei thil lam engmah ti lo tur leh, a ṭul huna insawnchhuak thei mai tura lo in ruahman lawk turin a chah.