Trump-a'n a hun tiam zawm turin Hamas vau leh

US president-elect Donald Trump chuan Palestinian firfiak pawl, Hamas chu Israel mi an hrente chhuah tura hun a bithliah chu zawm turin a vau leh. A huntiam hi an zawm lo a nih chuan Hamas tan a ṭha dawn lo hle a, anni chauh ni lo mi dang zawng zawng tan pawh a ṭha dawn lo hle a ni, a ti.

Donald Trump hian US President atana thlan tlin a nih hnu lawkah, Gaza Strip-a indo mek, Israel leh Hamas te chu inremna siam tur leh, Hamas pawh Israel an beih ṭuma an mi mante chu President atana lak luh a nih hun, January 20, 2025 hma ngeia chhuah vek turin a lo ti tawh a ni. Thawhlehnia Mar-a-Lago estate, Florida-a press conference a neihah he thu hi sawichhuak lehin October 6, 2023 a Hamas-ten Israel an beih kha thil thleng tur a ni lo tiin a sawi zui bawk.

Trump-a'n Middle East special envoy atana a ruat, Steve Witkoff chuan Israel leh Hamas inkahhai puanna tura inbiakna neih mek a nih thu leh, inremna siam thuai a nih theih a beisei thu a sawi. "President nihna leh a thusawite hian he inbiakna hi a nawr kal zel a, inremna siam thuai a nih a, mi ṭhenkhat nunna pawh kan chhanhim theih ngei kan beisei," tiin a sawi. Witkoof hian kar tawp lamah Qatar a tlawh dawn a, Qatar palaina hnuaia inremna siam tuma inbiakna neih chu an tifel hnai tawh niin a sawi a ni. Qatar-ah hian kar liamta aṭang khan inbiakna nei turin Israel leh Hamas aiawhte pawh an awm tawh a ni.

Hetih lai hian Israel leh Hamas hi inremna siam tur kawng daltuah a inpuh tawn ve ve reng thung. Hamas chuan Israel-in Gaza Strip-a indona a tih tawp a, a sipaite a lak chhuah vek hunah chauh an mi hrente an chhuah vek ang tih an sawi. Israel chuan Hamas-te hmun tih chhiat vek a, an mi hrente chhuah zalen vek an nih hma chuan indona a ti tawp dawn lo tih a sawi ve thung.