Russia-in missile 40 neih belh a tum

Russia President Vladimir Putin chuan kumin chhungin an ralthuam tihpun an tum thu leh, intercontinental ballistic missile 40 chuang neih belh an tum thu a sawi. A thusawi hi khawthlang ramte'n an ngaihven hle rin a ni.

US-in Russia ramri, Europe khawchhak lama NATO member ramah tank leh ralthuam lian dahna station dah a tum chu a dem thu a lo sawi lang tawh a, hemi hnu hian ralthuam neih belh a tum thu hi a puang a ni.

Russia official-te chuan an ṭhenawm rama US-in ralthuam dah a tumna chu a kaltlangpui a nih chuan an chhan let tur thu an lo sawi tawh bawk. Russia Deputy Defence Minister Anatoly Antonov chuan, "NATO ramte thiltih dan hian ralthuam neih ngah kawngah intlansiak turin min nawr lui zawk a ni," a ti.

Ukraine tualchhung buainaa Russia inrawlha puh a nih avangin tun hnaiah Russia leh khawthlang ramte inkar boruak hi a ṭha lo hle. European Union leh US kaihhruai khawthlang ramte chuan sum lamah Russia hrekna tur pawh an lo siam tawh bawk. Kum 2014 kumtir lam khan Ukraine khawchhak lama Crimea bial chu Russia-ah a bet a, hemi hnu hian Russia thlawp Ukraine helte chuan an ram khawchhak lamah inlakhran tumin an hel chhunzawm leh a ni.

Intercontinental ballistic missile-te hian km 5,500 chin an kap thei a, Putin chuan missile an neih belh turte hi eng ang nge tih erawh a sawichiang lo.