Donald Trump-a'n US president candidate chuh a tum

Mi hausa tawntaw, Donald Trump chuan kum 2016-a US Pre­si­dent thlanna neih tura Repub­lican candidate nih tumin a chuh dawn tih a puang ve leh ta.

US real estate milian leh TV reality star, Donald Trump hian politics-a luh a lo tum fo tawh nia sawi a ni. Thawhlehnia New York's Fifth avenue-a Trump Tower-a amah thlawptu pungkhawmte hmaah, Trump chuan US president candidate chuh a tum thu hi official-in a puang.

Trump chuan immigration, Oba­macare, US economy leh fo­reign policy chungchangte sawi chhuakin, "Min thlan tlin chuan Pathianin US president atana a dahte zinga hnathawk ṭha ber ka ni ang," a ti.

A thil neih zat tarlanna lehkha pawh lekchhuakin, Trump chuan US dollar tluklehdingawn 8.7 chuang a nei tih a sawi a, hei hi Forbes magazine-in a hausakna a chhut sak, dollar tluklehdingawn 4.1 aiin a sang zawk.

Kum 1946-a piang, Donal Trump hi The Trump Organization chairman leh president nilai a ni a, Trump Entertainment Resorts dintu a ni bawk. NBC-ah reality show, The Apprentice a siam bawk.

Trump hi Republican zingah president candidate chuh tum 12-na a ni. Republican party hian August thlaah candidate chuh tumte tan TV debate hmasa ber a buatsaih dawn a ni.

Republican president candidate chuh an tum thu puang tawhte chu- Jeb Bush, Ted Cruz, Rand PZaul, Marco Rubio, Ben Carson, Calry Fiorina, Mike Huckabee, Rick Santorum, George Pataki, Lindsey Graham leh Rick Perry-te an ni.

Hetihlai hian Democrats lamah party president candidate chuh tum mi pali- Hillary Clinton, Bernie Sander, Martin O'Malley leh Lincoln Chafee-te an awm tawh a, midang chuh tum an la awm rin a ni bawk.