Turkey sorkar thlawptuten kawng zawh

Turkey khawpui, Istanbul-ah Pathianni khan President Tayyip Recep Erdogan kaihhruai sorkar thlawptuten kawng an zawh a, kawngzawhnaah hian mi makta≠duai khat chuang an tel.

Yenikapi parade ground-a 'Democracy and Martyrs' Rally' hi President Erdogan-a kaihhruai sorkar a chak tawkzia lantirna kawng khat atana buatsaih a ni. Sorkar paihthlak tuma beitute dapchhuah hna an thawhna kawnga khawthlang ramte sawiselna chu an dem thu sawiin, dik lo taka thiltite dapchhuah chhunzawm zel a nih tur thu an sawi.

President Erdogan-a chuan rally-ah hian thu sawiin, July 15-a sorkar paihthlak tuma beitute chuan a tukah an thil tum a awlai loh zia hre chungin an harh a ni, a ti. Sorkar chuan fimkhur zawkin hnathawktute pawh a enfiah tawh dawn tih a sawi bawk.

Sorkar paihthlak tuma beih a nih hnuah Turkey thuneitute chuan sorkar beihnaa inhnamhnawiha rinhlelh mi sing tel an chhui≠chiang mek a, an zingah hian sipai, police, judge, journalist, medics leh civil servant-te an tel. Hetihlai hian khawthlang ramte chuan sorkar beih tumte laka beihpui thlak chu chhuanlama hmangin, President Erdogan chuan a thuneihna tih≠nghetna atan a hmang niin an puh.

Erdogan chuan parliament-in a pawm a nih chuan thi tura hremna dan chu hman leh a remti dawn tih a sawi a, khawvel ram dang eng emaw zatin he hremna dan hi an hmang a ni, a ti.

Mipui vantlang hmaa inlan khat tak, sipai hotu Hulusi Akar pawhin Yenikapi-a rally-ah hian a inlan a, an ram phatsantute chu hrem ngei an nih tur thu sawiin, sorkar paihthlak tumte hneh an nih theihna kawnga civil mite inpekna chu lawmawm a tih thu a sawi. Sorkar paihthlak tumtute beihlehnaah hian civil mi tam tak an thi tel a ni.