Los Angeles-a ram kang vangin mi 5 an thi tawh; Hollywood Hills-ah kangmei chhuak thar leh

US-a Los Angeles chhehvela ram kang chuan ziaawm lam a la pan thei lo a, ram kang vang hian mi panga an thi tawh a, chenna in tam tak kang chhiain, mi nuai khat chuang chu hmun him lama insaseng tura hriattir an ni tawh bawk. Ram kang ṭhelh hna thawh mek laiin, an ram huna Nilaini khan Hollywood Hills-ah kangmei chhuak thar a awm leh.

Los Angeles Fire chief, Kristin Crowley chuan hmun nga-ah kangmei hi nasa takin a la chhuak niin a sawi a, thli na tak a tleh leh, khua a ro bawk si avangin kangmei hi a kangkai chakin a ṭhelh hna thawh pawh a harsat phah niin a sawi. California state chuan ram kang vang hian emergency puangin, kangṭhelhtu chawl tawhte pawh ram kang ṭhelh hna thawhnaah hian thawk chhuak leh turin a ngen.

Kangmei chhuak vang hian mi nuai tel chu power supply nei loin an awm, zirna inte pawh khar a ni bawk.

Pacific Palisades-ah chuan ram acre 16,000 zau chu kangmei hian tuamin, chenna in leh sumdawnna hmun 1,000 vel a kang chhe tawh. Pacific Palisades-ah hian Hollywood mi lar eng emaw zat an awm a, anni pawh kangmei chhuak hian nghawngin tlanchhe zingah pawh an tel a ni. Altadena-ah ram acre 10,600-a zauah kangmei hi a chhuak bawk.Hollywood Hills-a ram kang hian ram acre 50 chuanga zau a tuam tawh bawk a ni.

Los Angeles county sheriff Robert Luna chuan kangmei chhuakin chhiatna a thlena thi hi mi panga an tling tawh tih a sawi.

US president Joe Biden pawhin Los Angeles hi panin, California governor Gavin Newcom nen an inhmu a, ram kang hi ṭhelh mih a nih thuai theihna turin an theihtawp an chhuah dawn tih a sawi.