SKorea court-in President Yoon manna tur thupek ti chhuak leh

South Korea court chuan president atanga chawlh lailawk tir mek, Yoon Suk Yeol manna tur thupek a ti chhuak leh.

Martial law a puan chungchangah Yoon hi anti-graft investigator-te chuan chhui chiang mekin, thu zawhfiah tura vawi thum an kohah Yoon hi a inlan duh lo vek a, hei vang hian court-ah manna tur thupek hi ti chhuak turin an ngen a ni. Court hian thupek hi a ti chhuak tawh a, mahse Yoon man tuma kalte hi presidential security guard-ten an lo dan avangin warrant in a huam chhungin an man thei lo a ni. Hemi hnu hian court-ah arrest warrant hi ti chhuak turin an dil thar leh a, court chuan a vawi hnihna atan a ti chhuak leh ta a ni. Warrant tih chhuah thar hian eng chen nge a huam erawh Corruption Investigation Office chuan an sawilang duh tawh lo.

Investigator-ten Yoon hi an man thei a nih chuan, South Korea president ni lai man hmasak ber a ni ang. Mahse an man hnuah hreng zui tur chuan darkar 48 chhunga arrest warrant dang ti chhuak leh tura an ngen leh nghal a ngai ang. Yoon hi martial law a puan chungchanga thubuai an siamsakah hian man leh thiam loh chantir a nih chuan, thi tura hremna thlenga pek theih a ni ang.

South Korea parliament chuan Yoon hi martial law a puan chungchangah President aṭanga paihthlak rawtna chu a pawm a, a chungthu ngaihtuah a nih chhung chu President a nihna aṭang hian chawlh tir a ni. President aṭanga paihthlak a nih dawn leh dawn loh hi Constitutional Court in a ngaihtuah dawn a ni.