Iran jail aṭangin Italian journalist Sala chhuah

Iran sorkar chuan Italian journalist an man, Cecilia Sala chu Nilaini khan jail aṭangin a chhuah a, an ramah hruai haw nghal a ni. Sala hi Il Foglia chanchinbu leh podcast company, Chora Media tana thawk a ni.

Kum 29 mi, Sala hi Iran-ah hian regular journalist visa hmanga lutin hna a thawk a, mahse nikum December 19 khan man niin Tehran-a Evin tan-inah hren a ni. Sala man a nih hma lawk hian Milan, Italy-ah Iran sumdawng Mohammaad Abedini chu Jordan rama drone hmanga US service member pathum thah an nih kaihhnawihah man a ni. Abedini hian drone part hi a supply nia sawiin, US chuan manna tur thupek a ti chhuak a, Milan-ah hian man a ni ta a ni. Man a nih hnu lawkah Iran lam hian Italian journalist hi an ramah an lo man ve leh nghal bawk.

Italy prime minister Giorgia Meloni chuan Nilaini zan khan Rome-ah Sala hi a lo hmuak a, chhuah zalen a nih theihna tura theihtawp chhuahtute chungah a lawm thu a sawi. PM Meloni hian kar liam ta khan sawi lawk loin Florida, US a tlawh a, US president elect Donald Trump a hmu a, Sala dinhmunte a sawipui niin a tarlang. Trump hian January 20-a Presdient atana lak luh a nih hma ngeia Sala chhuah tur hian a nawrpui nia sawi a ni a, mahse Meloni office lam chuan hemi chungchangah hian thuchhuah an nei lo thung.