Venezuela eptu hruaitu Maria Corina an hreng

Venezuela eptu hruaitu, Maria Corina Machado chu an ram huna Ningania presifend NIcolas Maduro laka lungawi lohna lantira nawrh huaihawtnaah telin, police-in manin an hreng zui. Mahse hun rei vak lo hnuah chhuah a ni leh nghal a ni.

Machado hi Caracas-a kawngzawhnaah a tel hnuah man a ni a, hei hi thla eng emaw zat hnua mipui hmaa an inlan lehna hmasa ber a ni. Hren a nih chhung hian thu zawhfiah a ni a, video eng emaw zat an siam tir niin an sawi. Chhuah a nih hnuah Maduro kaihhruai sorkar chu a beih let chhunzawm zel tur thu a sawi ve nghal bawk.

Nicolas Maduro hi nimin khan a term thumna atan Venezuela President atan lak luh a ni a, lak luh a nih hma ni hian eptute hian duh lohna kawngzawh hi an huaihawt a ni.

Kum 2024 July thlaa President thlannaahk han kum 62 mi, Maduro hi chaka puan a ni a, mahse eptu pawl leh ram dang eng emaw zat chuan he inthlan result hi an pawm lo a, pawm lo zingah hian US pawh a tel. Ram danga tlanchhe mek, eptu pawl candidate Edmundo Gonzalez zawk chu Presidenet-elect-ah an pawm hlawm a ni. Gonzalez hi nikum September thla khan Venezuela aṭanga tlanchhain, Spain-ah a khawsa a ni. Maduro kaihhruai sorkar chuan Gonzalez man a nih theihna atana information pe thei hnenah lawmman, USD 100,000 pek a tiam.

Machado pawh hi sorkar lamin a beih zinga a tel a, inthlan an neih zawh hnuah a biru zui a, Ningania rally-naah a inlan hmaa mipui hmuha a inlan hnuhnun ber chu nikum August thla kha a ni. Inthlan zawh hnuah hian eptute chuan lungawi lohna lantir ṭum eng emaw zat nawrh an huaihat tawh a, mi 2,000 chuang man an ni tawh. An zingah hian ram dang mi 10 an tel a ni. Eptute chuan an ram President thlanah khan Gonzalez zawk chu hneh taka thlan tlin a in tiin, electronic voting machine aṭanga an lak khawm tally sheet te pawh an online lamah an tlangzarh. An inthlan buaipuitu, United Nations leh Carter Center-a expert te pawhin eptute tally sheet tih chhuah hi a dik niin an sawi a ni.