Japan-in Russia hrekna thar a siam

Japan sorkar chuan nimin khan Russia ram hrekna a siam thar. Japan-a Russia mi, mimal leh pawl eng emaw zat thil neih chu khawih chet theih lohin a hrek sak a, hei bakah Russia rama pawl ṭhenkhat tana thil thawn chhuah a khap bawk. He hrekna hi Russia-in Ukraine a run vanga siam a ni.

Chief cabinet secretary Yoshimasa Hayashi chuan hrekna thar an siam leh hi Group of Seven-in Ukraine chunga Russia chet dan avanga hrekna nasa zawk siam tura a hmalakna kal zela nih thu a sawi.

Japan hian a hma in Russia hrekna hi eng emaw zat a lo siam tawh a, tun ṭuma mi hi nikum December thla laihawla G7 summit neih tuma prime minister Shigeru Ishiba-a'n Ukraine harsatna tawh mekah an theih anga hma an lak zel tur thu a sawi hnuah hrekna an siam hmasa ber a ni.

Foreign, trade leh finance ministry ten thuchhuah inṭawm an siamah, hrekna thar berah hian Russia rama mi mal 11, organisation 29 leh bank pathum bakah, North Korea mi pakhat leh Georgian bank a tel tih an sawi, heng mite hi Russi puihtu niin an tarlang. Hei bakah hian Russia sipai nena inzawmna nei organisation 12 hnenah bungrua thawn an khap bawk. An zingh hian technology leh khawl siamtute an tel.

Russia rama thawh luh khap item 355 siam bawkin, hei hi January 23 aṭanga hman ṭan tur a ni. Bungrua thawn luh an khap zingah hian motor engine leh parts, motorized bicycle, communication leh acoustic device, mechanical tools leh valve te pawh an tel a ni.