Buaina hlaua raltlan an pung

United Nations chuan kum 2014 chhung khan khawvel ram hrang hrangah buaina leh tih­duh­dah hlaua raltlan an tam hle a, mi maktaduai 60 dawn an tling tih a sawi.

Tualchhung indona, tharum thawhna leh tihduhdah hlauh vanga nikuma raltlan zat hi kum khat chhungah a la tam ber ṭum tiin a sawi.

UN refugee agency, UNHCR chuan sahimna zawnga mahni chenna tlanchhiatsan hi kum 2013 aiin kum 2014 ah khan maktaduai 8.3 in an pung tih a sawi. Raltlan an pun tamna chhan hi Syria tualchhung buaina thleng vang a ni.

UNHCR hotu Anto­nio Guterres chuan khaw­­vel dinhmun chu a chhe hle a ni tih a sawi a, ''Nitinin mi tam tak chungah tawrhna a thlen belh zel a, vanduaithlak takin heng zinga tam tak hi puih ngaihna pawh awm lo te an ni," a ti. Kum 2014 chhung khan himna zawnga tlanchhia hi nitin mi 42,500 awm ang an nih thu a sawi bawk. Raltlan zinga 50% chuang hi naupang an ni.

Syria ram bikah ri­ngawt pawh raltlan hi mak­­­­taduai 3.9 an awm a, an ram chhunga tlanchhia maktaduai 7.6 an awm bawk. Heng zinga tam tak hi an ṭhenawm ram, Le­banon, Jordan leh Tur­key-ahte an khawsa mek a ni.

Nikum chhunga raltlan zingah 126,800 chauh chu an ramah an kir leh niin a sawi a, hei hi kum 1983 hnua a tlem ber ṭum a ni. Raltlan, an rama kir leh zinga tam zawk hi Congo, Mali leh Afghanistan ram mite an ni.