China-in Ramzan-a chaw nghei a khap

China sorkar chuan an ram khawthlang lama Muslim tamna, Xinjiang bialah Muslim-te'n an hun pawimawh, Ramzan thlaa chaw an nghei ṭhin chu sorkar hnathawk, zirlai leh zirtitute'n an zawm ve a remti dawn lo.

Muslim-te thla thianghlim, Ramzan hi nimin aṭang khan hman ṭan a ni. Hemi chhung hian Muslim-te chuan ni chhuah aṭanga a tlak thlengin engmah an ei lo a ni. Mahse hei hi China sorkar chuan khapin, chaw nghei a khap bakah zirlaite chu sakhaw hminga thiltihnaa tel lo turin a ti bawk. Ramzan chhung hian restaurant-te pawh inhawng vek turin hriattir an ni tawh bawk.

Uighur muslim tamna, Xinjiang bialah hian sorkar thuneitute chuan kum dangah pawh Ramzan hman hi an lo khap tawh ṭhin a, hei hian sawisel a hlawh fo a ni. Uighur rights group-te chuan an hun pawimawh hmang thei loa thuneitute'n thupek an siam hian bial chhunga buaina a tihpunlun phah zawk niin an sawi. Mahse China sorkar chuan Xinjiang bialah hian firfiakte chetna thleng thei reng a nih thu sawiin, he biala tharum thawhna thleng ṭhinte pawh sakhaw lama kal fawrte vanga thleng ṭhin a ni, a ti.