SKorea PM thar atan Kyo-ahn pawm

South Korea justice minister Hwang Kyo-ahn chu Prime Minis­ter thar atan parliament-in a pawm.

PM hlui Lee Wan-koo chu eiruk­naa inhnamhnawiha puh a nih avangin PM a nihna aṭangin a bang a, Ningani khan a thlaktu tur hi National Assembly chuan a thlang a ni. PM thar tana Hwang Kyo-ahn rawtna hi member 156 in an thlawp laiin, a duh lo lamah vote 120 a tla.

February thla khan Wan-koo hian Chung Hong-won a thlak a Hong-won hi nikuma an rama lawng chesuala mi 300 chuang thihna thlenga a hmalak danah sawisel a tawh nasat avangin a bang a ni. SKorea rama thuneihna hi President kutah a awm a, Presi­dent-in a hna a thawk thei lo a nih chauhin PM hian ram hruai hna hi a thawk ṭhin.

Hetihlai hian SKorea rama Middle East Respiratory Syndrome (MERS) hri leng vanga thi chu nimin thleng khan mi 23 an tling tawh a, hri vei hi mi 165 an tling tawh bawk. World Health Orga­nisation (WHO) chuan hri leng an khuahkhirh theih loh avangin thu­neitute chu a lo sawisel tawh a ni.

MERS hri vei zinga a tam zawk hi damdawi-ina awm leh thawktute an ni a, hei vang hian WHO chuan damdawi lama thawkte leh mipuite'n hri leng chungchang in­hrilh­hriatna an neih ṭhat loh vangin a darh chak phah niin a sawi.

Natna hri vei finfiah tawhte pawh hun rei tak chhung emer­gency room-ah, midang nena in awmpawlhna hmunah dah an ni. Hei bakah hian hri veite enkawltu, doctor-te'n damdawi-in pahnih pathuma thawk kawpa an tlawh kual ṭhin chuan a tihdarh phah bawk nia sawi a ni.