LA ram kang vanga thi 16 an tling tawh

US-a Los Angeles ram kang vanga thi chu mi 16 an tling tawh. Thi zinga mi panga hi Palisade Fire zone-a mi niin, 11 chu Easton Fire zone-a mi an ni.

Kangmei chhuak zinga nasa ber pawl, Palisades Fire chu ṭhelh mih a la ni lo a, hmarchhak lamah a la kan belh zel a, hei vang hian California state chhim lam biala Brentwood leh Bel Air aṭangin hmun him lamah an insawnchhuak thar leh a ni.

Kangṭhelhtute chuan Los Angeles area-a kangmei chhuak ṭhelh tumin theihtawp an chhuah mek a, chenna in tam tak a kang chhe tawh a ni. Mahse thli na tak a tleh avangin kangmei chhuak hian hmun dang a kangkai chakin, a ṭhelh hna pawh duh angin an thawk thei lo a ni. Ram kang hian acre 23,6000-a zau a tuam a, kangmei chhuak zinga 11% chu an thunun thei tawh. Hetih lai hian Getty Center art museum chu a dinhmun a him tawh lo hle. Easton Fire hian acre 14,000 a zau tuamin, 15% an thunun tawh bawk.

Los Angeles chhehvela ram kang nasa tak tak paruk chhuak - Palisades Fire, Eaton Fire, Kenneth Fire, Hurst Fire, Woodley Fire, Lidia Fire, Sunset Fire, leh Tyler Fire te hian ram acre 40,000 dawna zau an kang chhe tawh a, chenna in leh sumdawnna hmun 12,000 chuang a chhe tawh bawk. Official-te chuan khua a ro leh thli na tak a tleh reng avangin an dinhmun hi a la him lo hle niin an sawi.

Investigator-te chuan kangmei chhuah chhan hi an chhui mek a, a chhan tak an la hrechiang lo. Tun ṭuma kangmei chhuak hi US chanchina ram kang thleng nasa ber nia ngaih a ni a, a thil tih chhiat hi USD tld 135 - 150 vel a tling thei dawn niin an chhut.

Harsatna nasa tak thleng mek karah thuneitu lam pawh an inpuh tawn nasa hle. California govenror Gavin Newscom chuan 117 million-galen reservoir hman a nih theih loh chhan leh, hydrand eng emaw zatah tui a awm loh chhante chhui chiang turin thupek a ti chhuak. Los Angels Fire chief Kristin Crowley chuan kangṭhelh hna thawhna kawnga fund awm ṭha lo leh, tui supply ṭha tawk lo chungchangah city official-te a sawisel ve bawk.