Ukraine-in NKorea sipai 2 man

Ukraine president Volodymyr Zelenskyy chuan Ukraine sipaiten Russia-a Kursk Oblast hmunah Russia sipaite pui tura tirh, North Korea sipai hliam pahnih an man tih Inrinni liam ta khan a sawi.

North Korea sipai mante hi an hliamte enkawl sakin, Ukraine khawpui Kyiv-ah Security Service of Ukraine (SBU) kutah an awm mek tih Zelenskyy chuan a sawi a ni. Heng sipai pahnihte an man avangin Ukraine paratrooper leh Special Operation Forces-a sipaite a fak thu a sawi bawk a ni.

Zelenskyy chuan Ukraine beih meknaah North Korea a inrawlh dan thup tumin Russia leh NKorea chuan indona avanga NKorea sipai hliam tuarte chu an ti hlum zel niin a tarlang a, hetiang kara NKorea sipai hliam tuar an man thei chu thil awlsam tak a nih loh thu a sawi. Sipai an mante hi SBU investigator-ten thu an zawt a, President Zelenskyy pawhin SBU hnenah journalist ten an hmuh phalsak turin a hrilh a, "Khawvelin thil awm dan dik tak chu a hriat a ngai a ni," a ti. Zelenskyy hian sipai pahnihte thlalak hi a post bawk a, mahse NKorea sipai an ni tih erawh a sawilang lo.

Russia hian NKorea sipaite hi an nihna thupna atan ID lem a siamsak nia sawi a ni. Russia pui tura NKorea sipai tirh hi tam tak an thi tawh niin White House chuan a lo sawi tawh bawk.