Donald Trump hremna pek ti chhuak

Mi dang ka hupna atana sum pea puhna thubuaiah, US president-elect Donald Trump hremna chu New York court chuan ti chhuakin, 'unconditional discharge' pek a ni. He hremna hi hremna vang tak leh nep tak niin, jail tan emaw, hren leh pawisa emaw a ngai hran lo.

Donald Trump thubuai hi kum 2016 US President thlanna neih dawna adult film star, Stormy Daniels-in an lo inkawp tawh nia a sawi chungchangah a ka hupna atana USD 130,000 pe a an puhna a ni. Mahse Trump chuan a puhna hi a pha thung.

New York Supreme Court Justice Juan Merchan chuan Trump hremna hi puangin, inthlanna neih zawh takah mipuiten Donald Trump chu White House-a kir leh tura an thlan avangin, unconditional discharge nilo hremna dang chu January 20-a US President atana lak luh a nih huna venhimna pek nen an inkalh theih dawn niin a sawi. Trump hi court-in a hremna tur a puan lai hian amah pawh a inlan lo a, jail tantir a ni dawn lo tih a chian avangin virtual in a inlan a ni. Trump hi President atan thlan tlin ni lo ta se, a thubuaiah hian kum li thleng lungin tan tir theih a ni ang.