Ni khat chhunga khawvela Hri kai tam ber ni thleng

World Health Organization (WHO) chuan Pathianni khan ni khat chhunga khawvela Covid-19 hri kai hmuh chhuah tam ber ni a thlen thu a sawi a, hemi ni hian khawvel pumah hri kai hmuh thar  mi 3,07,930 an awm.

Nimin thleng khan khawvel pumah hripui leng mek, Covid-19 kai hmuh chhuah tawh mi maktaduai 28.6 chuang an awm tawh a, heng zingah hian mi 9,17,400 chu he hri vang hian an thi tawh tih WHO chuan a tarlang. US chu khawvela hri kai tamna ber ram leh he hri vanga thi tam berna ram a la ni reng bawk.

Johns Hopkins University-a Center for Systems Science and Engineering (CSSE) tarlan dan chuan US-a hri kai tawh zawng zawng hi mi 65,01,904 an tling tawh a, he hri vanga thi hi mi 1,93,843 an awm tawh bawk a ni. Brazil ram chu Covid-19 hri vanga thi tam berna ram dawttu a nih bakah hri kai tam berna ram pathumna a ni mek a, Pathianni khan Brazil-a thi zat awm chu mi 415 an niin, anni nen hian Brazil-a Covid-19 vang thi tawh zawng zawng hi mi 1,31,663 an tling tawh.