US President thlan dan kalphung

Khawvel ram ropui, United States of America (US) President thar chu kumin November 3 hian thlan a ni leh dawn a, inthlan neih tur atan hian party lian pahnih, GOP (Grand Old Party) tia sawi, conser­vative party Republican Party leh liberal party, Democratic Party-te pawhin ngawrh takin campaign an nei chho mek. 

Inthlanah hian party tenau te pawh awm ve ṭhin mah se, party lian pahnih hian lalna an inchan chhawk a, hei vang hian party pahnih rorelna tiin an sawi ṭhin. 

Kum 1792 aṭang khan kum li danah US president thlanna hi neih ṭhin a ni. Kumin inthlan turah hian Republican party aṭangin President ṭanglai, Donald Trump leh Democratic Party aṭangin Joe Biden-te chu presidential candidate atan hian vawrh chhuah an ni. Candidate pahnihte hian an thawhpui tur, vice presidential candidate tur pawh thlang tawhin, Donald Trump hian vice president nilai Mike Pence leh, Joe Biden hian California Senator Kamala Harris a thlang a ni. 

US President leh Vice President thlanna hi indirection election a ni. Mipuite chuan direct-in an ram President hi an thlang lo a, President thlangtu tur Electoral College member tur an thlang chhuak zawk a ni. Electoral vote-a majority hmu pha, (vote 538 awm aṭangin vote 270 hmu pha) chu President-ah a tling a ni. 

1) Primaries leh Caucuses : Party lian pahnihte chuan an party aṭangin president candidate tur an thlang ṭhin a, candidate thlang chhuak tura a bul ṭanna hmasa ber chu primary leh caucus election an ti.

State ṭhenkhatin primary election an neih laiin ṭhenkhat chuan caucus an nei thung. Primary-ah hian party member ten secret ballot hmangin delegate (aiawh) an thlang chhuak a, state ṭhenkhatah chuan party-a registration ti tan lo chuan vote thlak theih a ni lo.

Caucus-ah ve thung chuan party mem­ber-te kal khawmin, vote thlak ve kher loin  delegate an thlang chhuak mai ṭhin.

Primary election hi state leh tualchhung sorkar ten an buatsaih ṭhin a, caucus erawh party-in a buatsaih ṭhin thung. A tlangpuiin January aṭanga June thla inkarah inthlan hi an nei ṭhin. State ṭhenkhat chuan primary leh caucus inthlan hi an nei kawp ve ve.

2) National Convention - Party inkhawm­pui tiin sawi ila a dik mai awm e. A tlangpuiin July thlaah an nei ṭhin. Kumin­ah erawh chuan US-a hri a len nasat avangin kum dang angin an buatsaih thei lo a, August thlaah neih niin ṭum dang angin party member pawh an pungkhawm thei lo. 

Kumina Republican party aṭanga delegate thlan chhuahte hi mi 2,550 an ni. Democrat aṭanga delegate thlan hi mi 3,979 an ni bawk. Heng delegate-te hian inthlan huna an party President leh vice president nominee an thlang chhuak ṭhin a ni. 

Party National Convention-ah hian official-in party presidential candidate hi puan an ni ṭhin. August 19-a Democratic National Convention-ah Joe Biden chu Democratic presidential candidate tan nominate a ni a, Donald Trump chu August 24 khan Republican National Convention-ah a ṭum hnihna atan presidential candidate atan nominate a ni bawk. 

3) Campaign runpui - A tlangpuiin July thla atangin October (thla thum chhung) hian president atan nominee-te chu nasa takin campaign an nei ṭhin a, state hrang hrangah rally te huaihawtin, TV kaltlangin vawi hnih emaw vawi thum tal president nominee-te hian debate an nei ṭhin.

4) General Election - President thlanna hi  November thla Thawhṭanni hmasa ber dawta Thawhlehni hmasa berah neih a ni ṭhin. Kuminah hian November 3-ah inthlan hi an nei dawn a ni. Kum 18 chinin vote an thlak thei a, vote neite hian elector an thlang chhuak ang.

5) Electoral college - General election-a mipuite vote thlakte hian President thlangtu tur Electoral College member an thlang ṭhin a ni. State tinte chu mipui tam dan azirin member an neih dan a in ang lo a, elector an neih hi House of Representative leh Senate-a an state member neih zat nen a in ang zel a ni. 

Elector-te hi mi 435 an ni a, heng mite hi US-a state 50 aṭanga thlan chhuah te an ni. State lian (area) ai mah chuan state-a mipui chen tam dan azirin state-te hian elector an nei tamin an nei tlem thei thung. 

US Congress (parliament)-ah hian upper house, senate an awm ve bawk a, heng mite hi US state 50 aṭangin pahnih zel an ni. Anni bakah hian District of Colombia-a elector pathum nen, electoral college member hi an vaiin mi 538 an ni. Heng mite hian president leh vice president chu an thlang chhuak ṭhin a, inthlanaa chak tur chuan electoral vote 270 hmuh phak a ngai.

Elector thlan chhuahnaa mipui vote hi 'popular vote' an ti. Inthlana popular vote hmu tam zawk hi an tling tihna a ni chuang lo. Kum 2016 President thlannaah pawh khan Democrats candidate Hillary Clinton khan Republican candidate Donald Trump aiin popular vote a hmu tam zawk a, mahse Trump khan electoral college vote a hmuh tam zawk avangin US President a ni ta zawk a ni. 

He system hi Maine leh Nebraska state tih loh state dangah chuan an hmang vek a, he system awmzia chu elector tam zawkna party chu party dang aṭanga elector thlan chhuah pawhin an thlawp vek dawn a ni. 

Entirnan California state aṭangin elector 50 awm ta se, chung elector-te chu mipui ten an thlang chhuak ang a, elector 50 thlan chhuah zingah a zahve aia tam, 26 chu Republican party mi an nih chuan, a dang zawng elector 24 pawhin Republican an thlawp ang.

Kan sawi tak electoral college-te khian kumin December 14-ah hian US president tur leh vice president tur thlangin vote an thlak ve thung ang. Chumi hnuah inthlan result puan a ni ang a, nakkum January 20-ah president thlan thar lawmluhna neih a ni ang.

President thar lakluhna hi Washington DC-a US Capitol building-ah neih ṭhin a ni. January 20-ah lakluh inkhawm hi neih ṭhin a ni a, mahse January 20 hi Pathianni a nih chuan January 21-ah neih a ni zawk ṭhin.