Japan rorellai party hruaitu atan Yoshi­hide Suga thlang tling

Japan prime minister aṭanga Shinzo Abe a ban avangin rorellai party hruaitu thar thlanna, nimina neihah chief cabinet secretary Yoshi­hide Suga chu thlan tlin a ni a, prime minister thar ni tura rin nghal a ni. 

Kum 71 mi, Suga hian Liberal Democratic Party (LDP) election-ah vote 534 aṭangin vote 377 a hmu pha a ni. A khingpui defence minister hlui Rival Shigeru Ishiba chuan vote 68 hmuin, foreign minister hlui Fumio Kishida chuan vote 89 a hmu. .

Su hi PM kalchhuak Shinzo Abe nena inhnaih tak niin, Abe-a economic leh foreign policy-te pawh chhunzawm zel a tum thu a sawi. 

Karleh Nilaini hian virtual meeting hmangin Parliament chuan prime minister thar tur hi an thlang dawn a, LDP hian lower house-ah majority an neih avangin Suga hi tling chiang sa turah ngaih a ni. PM thar hian Abe term la hman zawh loh, nakkum September thla thleng ram hruaitu lu ber hna hi a chelh chhun­zawm dawn a ni.