Israel PM-in Qatar-a inbiaknaah Mossad Director tirh remti

Israel prime minister Benjamin Netanyahu chuan Gaza Strip-a inkahhai puan a nih theihna atana Qatar-a inbiakna neihnaa tel turin Mossad director David Barnea tirh a remti.

Prime Minister Netanyahu office chuan Mossad Director tirh a nih tur thu hi puangin, a kal hun tur tak erawh an sawilang lo. Israel leh Hamas pawl hian midang kaltlanga inbiakna an neihah a hmawr an bawk thei dawn hnai tawh nia sawi a ni. Barnea hi a tel a nih chuan, inremna an lo siam a nih pawhin Israel aiawha hming ziah hnan thei nghal tur niin, hei hian inbiakna pawhin hma a sawn chho zel niin a ngaih theih a ni.

Thla 15 chuang indona a thlen a hnuah, Israel leh Hamas hian ṭum khat chiah inkahhai an puang tawh a, hei pawh hi indo ṭantirh lamah a ni. Hemi hnua inremna siam leh a nih theihna atana US, Egypt leh Qatar te hmalakna chu tun thlengin a la hlawhtling thei lo a ni. Rawtna tam zawk chu remti dun thei mah se, Israel lam hian inkahhai puan chhungin Egypt-Gaza border hrul, Philadelphi Corridor-ah an sipaite dah chhunzawm a phut a, mahse Hamas lam hian Israel sipaite chu an vaia hnuhdawh vek an phut thung.

US president-elect, Donald Trump chuan January 20-a US President atana lak luh a nih hma ngeiin inremna hi siam turin a lo nawr tawh a, Hamas-te pawh White House-a a luh hmaa Israel an beih ṭuma an mi man, an la hren mekte an chhuah loh chuan an dinhmun a chhe viau dawn niin a lo vau tawh a ni. Israel media-te pawhin tang inthlengna tur inremna hi tihfel a ni dawn hnai tawh niin an sawi. Hetih lai hian Israel chaun Gaza Strip-a Hamas ho hmunte chu a la bei chhunzawm reng thung a ni.