Ethiopia-a nawrh huaihawtte sipaiten an kap

Ethiopia ram Oromia leh Amahar biala sorkar laka lungawi lohna lantira nawrh huaihawt mipuite chu security force-ten an kap a, mi 90 chuang an thi nia sawi a ni.

Hetihlai hian sorkar news agency chuan dan kalha nawrh huaihawtte chu 'anti-peace force' ten an thunun theih thu a sawi a, thi an awm leh awm loh a tarlang tel lo.

Eptu pawlte chuan nawrh huaihawt zingah security force-te silai hmehpuaha thi hi mi 50 vel an tling tih sawiin, mahse Amnesty International chuan mi 97 niin a sawi a, Oromia bialah mi 67 leh Amhara bial mi 30 an thi tih a sawi.

Amnesty International Deputy Regional Director for East Africa, Michelle Kagari chuan Ethiopia sipaite chuan mipuite vaubeh nan an ralthuamte an chelek niin a sawi. He thil thleng vang hian Ethiopia thuneitute chuan kar kalta kartawp chhung khan an ramah internet a tihtawp phah a ni.

Oromia bialah hian khawpui zauhna tura sorkarin leilet ramte lak a tum avangin hun rei tak mipuiten lungawi lohna an lo lantir fo tawh a ni. Kumin January thla khan sorkar chuan land scheme hi a titawp a, mahse nawrh huaihawt zinga eng emaw zat mante chhuah tura phutin, lungawi lohna hi an la lantir chhunzawm reng a ni.

Amhara bialah pawh Wolkayt district ram inchuh vangin hun rei tak an buai tawh a, he ram hi dik lo takin hmarlamna an ṭhenawm, Tigray bial tana pek niin an sawi.

Ethiopia ramah hian Oromo hnam hi a tam ber niin, an ram mipui maktaduai 100 zinga 30% chuang an tling a, Amhara hi a tam ber dawttu a ni. Mahse eptute chuan an rama Tigrayan hnam, 6% vel chauh awmte chuan sorkar leh sipaite chu an thunun tlat niin an puh.

Hetihlai hian Ethiopia sorkar chuan dan kalha nawrh huaihawt chungchangah hian ramdang mi leh social media activist-te chu mawhphurtuah a puh a, sorkar≠in warning a pek pawh an ngai pawimawh duh lo tih a sawi. Nawrh huaihawtte hian sorkar leh mimal hmun pawimawhte an tichhe nasa a, tharum thawhna nasa tak thlenin pawisawiloten nunna an chan phah a ni, a ti.

US chuan Ethiopia rama thil thleng chu pawi a tih thu a sawi a, sorkar chuan mipuiten an duh loh zawng lantir tur dikna chanvo an neihte zahsak se a duh thu a sawi.