Pakistan Taliban-ten Quetta hospital beitu niin inchhal

Pakistan Taliban pawl pakhat, Jamaat-ul-Ahrar chuan Thawhṭannia-a Quetta hospital-a thihchilh bomb tipuaktu an nih thu an sawi. Hospital beihnaah hian mi 70 vel an thi a, an zingah hian lawyer leh journalist eng emaw zat an tel a, hliam tuar 120 vel an awm bawk.

Jamaat-ul-Ahrar (The Party of Freedom Fighter) hi kum hnih kalta kha Pakistan Taliban aṭanga indin an ni. US State Department chuan JuA kar hmasa khan firfiak pawlah a lo puang tawh a ni. Thuchhuah siamin, Balochistan province bar association Bilak Kasi an thah hnuah hospital hi an bei leh niin an tarlang.

Kasi hi court pana a kal tur chu mi tu tih hriat loh ten a car beiin silaiin an kap a, damdawi-in panpui ni mah se a hliam hi a tuar chhuak zo lo a ni. A thih thu hriaa Civil Hospital-a lawyer leh journalist eng emaw zat an punkhawm laiin hospital hi bomb hmanga beih zui a ni leh a ni.

Official-te chuan hliam tuar zinga a na zual, mi 27-te chu helicopter hmangin Karachi panpui nghal an ni tih a sawi.

JuA-in an tih nia an chhal hnu lawkah, Islamic State (IS) firfiak pawl pawhin, Quetta hospital beitu an nih thu an sawi ve bawk. IS chuan hospital beihnaah hian mi 200 vel an thi niin a sawi a ni.

Pakistan lawyer-te chuan Quetta khuaa lawyer eng emaw zat thah an nih avanga lungawi lohna lantir nan nimin khan an ram pumah court rorel an boycott. Balochistan province-ah pawh mitthi te sunna school khar vek a nih thu sorkar thupuangtu Anwar-ul-Haq Kakar chuan a sawi.