Security expert-ten Trump-a open letter an thawn

US President thlanna neih tura Republican party official candidate, Donald Trump chu an party chhungah duh lotu eng emaw zat an awm a, Republican national security expert-te chuan Trump hi thlan tlin a nih chuan America president zinga pawisak nei lo ber tur a nih thu an sawi.

Republican national security expert 50-te chuan Donalh Trump hi open letter an thawn a, an zingah hian CIA director hlui Michael Haydenpawh a tel. Lehkha an thawnah hian Trump chu America president ni turin a nungchang, a thil hlut zawng leh a tawnhriat neihte chu a tlak lo a ni, an ti.

Donald Trump chuan Constitution, US law leh US institution-te a hre tawk loin a ring lo bawk a, sakhaw intluktlanna te, press mite zalenna te, independence judiciary-te chu a ring lo a ni tiin, an zinga tumahin Trump hi US President atan an vote dawn lo tih an sawi bawk.

Trump chuan thuchhuah siamin a chhanglet ve nghal a, lehkha thawntute chu khawvel tihnawktute, dinhmun hlauhawma siamtute an ni tiin, thuneihna chan duh, hlawhchham si te an ni, a ti.

America mipuite ngaihdan lak hnuhnung berah President atana Democratic candidate Hillary Clinton-i duhtu an pung zel a, Donald Trump nen an inthlauhna pawh a tam sawt hle. Clinton-i hian point 8-in Trump-a lakah hma a hruai a ni. Democrats party member zingah 92% ten an party candiate an thlawp thu an sawi laiin, Republican party-ah chuan an party candite thlawptu hi 83% an awm thung.