Isua thilmak tihna hmuna biak-in hal a ni

Isua Krista-in a damlaia chhang­­per panga leh sanga pahnih hmanga mi 5,000 a hraina hmuna biak-in sak chu mi tu tih hriatlohten an hal a, biak-in bangah te thu an ziak rang bawk.

Galili dil kam, Tabgha-a Church of the Multiplication of the Loaves and Fish hi kum zabi panga-na laia Byzantine biak-in hmun hluiah sak a ni. Ningani zing khan hal a ni tih Israel police-te chuan an sawi.

Biak-in kang hian a chhung lam leh a chung lam a tichhe nasa hle a, ṭawngṭaina hmun erawh a chhe tello. Father Matthias Karl chuan kangmei chhuak hian souvenir shop, office leh meeting room-te a tichhia a, Bible leh prayer book-te pawh an kang chhia niin a sawi. Isua-in chhangper panga leh sangha pahnih a dahna lung nia sawia in sak erawh chu a chhe tel lo.

Biak-in haltute hian a bangah hian 'Pathian lemte chu an lu tansak an la ni ang' tih thute an ziak a ni. He biak-in hi German Roman Catholic Church ta niin, Benedictine puithiamten an enkawl a ni.

Israel Deputy Foreign Minis­ter Tzipi Hotovely chuan pawi­khawihna thleng chu a dem takzet tih a sawi a, 'Israel chuan sakhaw tinte zalenna humhalh sak chu a tum a ni a, hetianga intihnat tumna hi a hnawl a ni' tiin, pawikhawihtute chu man ngei an nih tur thu a sawi.

Police-te chuan rinhlelh thilah Juda mi 16 an man a, mahse thu an zawhfiah hnuah an chhuah leh vek a ni. Nikum khan Juda mi ṭhenkhat chuan Church of the Multiplication pawn lama prayer area chu an lo bei tawh a, he hmuna inkhawmte chu lunga tawngin, Kros dah chu an vawmchhiat bakah ṭhuthlengte pawh an lo tichhe tawh a ni.

Israel leh West Bank-ah hian Kristian leh Muslim hmun thianghlimte beih an ni leh ṭhin a, pawikhawih ṭhinte hi West Bank-a khawsa, Juda firfiakte nia rin an ni.