Thailand-ah MERS hri vei hmuh a ni

South Korea ramah hri leng mek, Middle East Respiratory Syndrome (MERS) vanga mi 24 an thih hnuah, Thailand ramah pawh MERS vei hmuhchhuah a ni ve leh.

Thailand health official-te chuan MERS vei an hmuh hi kum 75 mi, a lung na enkawl tura Oman aṭang Bangkok rawn pan a nih thu an sawi. MERS a vei tih finfiah a nih hnuah enkawl tura dahhran nghal a nih thu an sawi bawk. He hri vei an hmuhchhuah hi finfiah a nih hmain mi 60 vel nen an intawk hman a, heng mite pawh hi chhuichian an ni ang.

Thailand hi damdawi lama inenkawlna hmunpui a ni a, Middle East aṭang pawhin damloten an pan nasa thei hle. Health Minister Rajata Rajatanavin chuan, 'MERS vei hmuhchhuah a nih avang hian mipuite chiai lo turin kan ngen a, amah leh a chhungte pawh dahhran an ni nghal a ni' a ti.

Hetihlai hian MERS hri len mekna, South Korea-ah chuan nimin khan mi pakhat a thih belh leh a, a ni nen hian MERS vanga thi hi mi 24 a tling tawh a ni. Hri vei finfiah tawh mi 166 an awm tawh bawk. Hei bakah hian mi sang chuang chu enfiah tura dahhran an ni.

Middle East Respiratory Syndrome (MERS)

- RNA virus group niin, mihring leh ransaah natna thlen thei a ni.

- Hri leng hmasa ber hi kum 2012 khan Middle East-ah hmuhchhuah a ni. MERS vanga thihna thleng hmasa ber chu kum 2012 June thla khan Saudi Arabia-ah a thleng a ni.

- A inkaichhawn dan tak hi hriat­chian a la ni lo. Virus hi a hri vei tawh khuh leh hah­chhiau aṭanga darh thei nia ngaih a ni.

- Hri vete chu an khua a sik a, an khuh bakah thawk lamah harsatna an nei ṭhin. MERS hian pneumonia leh kal ṭha lo thlengin a thlen thei.

- MERS vei tawh zinga 36% in an thihpui a, a enkawlna bik emaw vaccine emaw a la awm lo.