Charleston biak-ina kahhlumte sunna hun hmang

South Carolina, US-a Charleston biak-in chu Nilani zan khan mi pakhatin silaia beiin mi pakua a kaphlum a, Ningani zan khan US hmun hrang hrangah thite sunna hun hi hman a ni. Thi zingah hian pastor pawh a tel.

Charleston-a mihang biak-in, Emanuel AME Church beitu nia rinhlelh, kumk 21 mi Dylann Roof chu man a ni tawh a, Ningani khan court-ah hruai nghal a ni.

US President Barack Obama chuan misual kuta thite a tawrhpui thu sawiin, a nupui nen chuan Emanuel AME Church member eng emaw chu an hre ṭha hle a, an zingah hian thi zinga mi, pastor Clementa Pinckney pawh a tel tih a sawi. Obama chuan biak-in chu hmun thianghlim a ni a, hetiang hmuna pawikhawihna rapthlak tak thleng chu pawi a tih thu leh, ram changkang dangah hetiang hi a thlen ve loh thu a sawi.

Pawikhawihtu ni hriat, Dalton Tyler hian vun rawng inthliarna a thlawp thu pawh a hmain a lo sawilang tawh a, civil war tihchhuah leh a duh thu te a sawi a ni. Biak-in awmte a pawngkah hma hian darkar chanve dawn chu Bible study group-ah pawh a tel nia sawi a ni bawk.