Portugal-ah ram kang vangin mi 400 chuang sawnchhuak

Portugal rama Madeira Island-a ram kang vangin mi 400 chuang chu hmun him lamah sawnchhuah an ni tawh a, meikhu hip luh vang-in mi 174 chu damdawi-a enkawl ngaiin an awm bawk.

Ram kang hian thliarkar khawpui, Funchal lam pan mah se thunun theih a ni tawh nia sawi a ni a, hei bakah hian nimin khan boruak lum lutuk chuan ziaawm lam a pan avangin hei hian kang-ṭhelhna kawngah pawh a pui hle niin Madeira regional government hout Miguel Albuquerque chuan a sawi.

Portugal ram laiah pawh ram a kang nasa hle a, Thawhlehni khan ram kang zinga hmun pasarih a mi chu ṭhelh mih theih lohin a la awm mek niin fire official-te chuan an sawi. National Civil Protection service chuan ram kang hi kangṭhelhtu 4,000 velin ṭhelh tumin an bei mek a, motor 1,262 leh thlawtheihna 26 an hmang niin a tarlang.

August thla hi khaw lum vang-lai a ni a, thli a tleh tel ṭhin bawk avangin Portugal leh Europe chhim lam ramah chuan ram a kang fo a ni. Portuguese official-te chuan ram-hnuaia thing ro te chu thenfai ṭhat an nih loh avangin kangmei chhuak pawh hi a kangkai chak niin an sawi.

Fire service official-te chuan Madeira tlang sang leh ram ngaw chhah takte chuan kangmei chhuak
ṭhelhna kawngah harsatna a siam niin an sawi a, hei bakah hian thli tleh chuan kangmei chhuak chu a tidarh chak tih an sawi. Madeira-a kang-
ṭhelhtu pariat chu meikhu an hip luh tam avangin damdawi-a enkawl ngaiin an awm a, damdawi-in damlo 200-te pawh venthawn thilah hmun dangah sawn an ni tawh bawk.

Hmar lam bialin ram kang hi an tuar nasa zual a, heng biala hian khaw lum lam hi 86 Fahrenheit te a kai chho a ni. Hun rei tak ruah a suh loh avangin ramhnuaite pawh a ro chak hle a ni.