US-ah Covid-19 vanga thi Mi nuai 2 chuang tawh

Johns Hopkins University  report-in a tarlan danin Thawhlehni khan US-a Covid-19 hri vanga thi chu mi nuai 2 chuang an ni tawh a, US hi Covid-19 vanga thi tam berna ram a la ni mek bawk.

Nimin thleng khan US-a Covid-19 vanga thi hi mi 2,00,814 an awm tawh a, hri kai zat hi mi 68,97,432 awm tawhin, enkawl dam hi mi 43,47,172 an awm tawh thung. Kumin kum tawp lam hian he hri vanga thi hi mi 4,00,000 chuang an tlin theih rin a ni.

Thla nga chhung hi US hi khawvela hri kai hmuh chhuah leh hripui thihpui tamna ber ram a ni tawh. US-ah hian khawvel puma mihring awm zat aṭanga 5% aia tlem mah an awm laiin, khawvel puma hri kai thihpui tawh zinga 20% chuang chu US mi an ni tawh. 

Brazil chu hripui vanga thi awm tamna ber dawttu ram niin, India leh Mexico-ten an dawt a ni. Worldometers-in a tarlan danin, nimin thleng khan khawvel pumah hri kai hi mi 3,18,16,647 an awm tawh a, an zinga mi 9,76,021 in an thihpui tawh a ni. Hri kai zinga 2,23,420,714 chu enkawl dam an ni tawh bawk. 

US dawtah India chu hri kai tamna ber a ni a, mahse Brazil aiin hripui thihpui hi India ramah an la tlem zawk thung. Brazil, Russia, Colombia, Peru, Mexico, Spain, South Africa leh Argentina ramte chu hri kai tamna ram 10 zingah an tel bawk.