Fatah leh Hamas ten inbiakna nei

West Bank-a rorel lai Palestinian party, Fatah leh Palestinian Sunni-Islamic fundamentalist militant Hamas palaite chu Thawhlehni khan Turkey khawpui Ankara-ah inremna zawngin inbiakna an nei ṭan. 

He inbiakna neih mekah hian Palestinian ten harsatna tam tak an tawhte pawh sawiho a ni dawn a, US president Donald Trump-a Middle East plan pawh sawi tum a ni bawk. Heng bakah hian United Arab Emirates (UAE) leh Bahrain-in Israel an pawmna chungchangte pawh sawi hona tuarah a tel. 

Gaza Strip-ah Fatah leh Hamas ten thuneihna chan tuma an inbeih fo vangin kum 2006 aṭang tawh khan Palestinian-te hian inthlan an la hmachhawn thei lo a, tun ṭuma inbiakna an neihah inthlan chungchang pawh hi an sawi dawn a ni. Palestinian group pahnih Hamas leh Fatah-te hi kum 15 chuang an  intithiam lo tawh a, kum 1992 khan Oslo Peace Accord chu Israel leh Palestine (PLO) chuan an ziak a, PLO chuan Juda-te ram luah chu Israel ram a ni tih a pawm a, Israel chuan Palestinian ram a luah sakah chuan  anmahnia inrelbawlna kalpui a remti ve bawk. 

Hamas ho chuan Oslo Accord an dodal a, Israel ram zawng zawng chu Palestinian ramah a chhal a, Gaza Strip chu kum 2007 khan an thuneihna hnuaiah a awm a ni. Fatah ho hian Oslo Accord chu an thlawp thung a, West Bank-ah ro an rel ve thung a ni.