Damdawi-in aṭangin Russia eptu hruaitu chhuak

Russia eptu hruaitu, tura hrai nia sawi Alexei Navalny chu Germany damdawi-inah ni 32 chhung enkawl a nih hnuin nimim kha chhuah a ni. 

Kum 44 mi, Navalny hi Berlin-a Charity hospital-ah enkawl a ni a, ni 24 chhung chu intensive care-ah dah a ni. Doctor-te chuan a dinhmunin hma sawnin a ṭha chak hle a, damdawiin chhuahsan thei khawpin a ṭha tawh tih an sawi. Hemi rual hian tura hrai a nihna hian a taksaah eng angin nge nghawng a neih zel dawn erawh an sawi mai thei bik lo tih an sawi. 

Russia President Vladimir Putin khing zo tur bera ngaih, Navalny hi August 20 khan thlawhtheihnaa a chuannaah tura hrai a nih avangin nikhaw hre loin a awm a, damdawiin panpui nghal a ni. A hnu ni hnihah Germany-ah enkawl turin hruai a ni. German chemical weapon expert-te chuan Navalny hi Soviet-era nerve agent Novichok hmanga hrai a nih thu an sawi a ni.