Libya sipaiten IS headquarters la let

US thlawp Libya tualchhung sipai pawl khat chuan Sirte khuaa Islamic State (IS) firfiak pawl headquarters chu an la let tawh niin an sawi.

Tualchhung sipai, Al Bonyan Brigade fighter zinga a tam zawk chu Sirte khaw ṭhenawm, Misrata khua ami te an ni a, Libya sorkar thlawpin IS hmun an beihnaah hian US sipaiten thlawhtheihna hmangin an lo pui bawk. Khawpui chhunga firfiakten inkulhna ber atana an hman, convention centre chu an la let tawh a ni.

Sorkar thupuangtu Rida Isaa chuan, "Kan sipaite chuan Ouagadougou complex pum an la tawh a, hmun dang pawh lak tumin hma an sawn zel a ni" a ti. Firfiakte nen an inbeihnaah hian fighter 16 an thi a, mi dang 11 in hliam an tuar.

IS hian kum 2015 khan Sirte khua hi Libya sipaite kut aṭangin an la a, Syria sorkar chuan lak let tumin a bei zui nghal a, August 1 aṭang khan US sipaite chuan thlawhtheihna hmanga beihpui thlakin a lo pui a ni. America President Barack Obama chua Sirte
aṭanga IS firfiakte umchhuak tura Syria sipaite hmalakna chu puih an inhuam thu a lo sawi tawh a ni.

Al Bonyan Brigade fighter-te hian kumin June thla aṭang khan Sirte khua lak let tum hian beihpui an thlak ṭan a, IS sniper-ten an hman ṭhin, khawpui laili laia building pawimawh tak pawh a la kir tawh a ni.

US Africa Command-in thuchhuah a siamah, Thawhlehni aṭang khan Sirte khuaa beihpui an thlakna, 'Operation Odyssey Lightning' an neihah ṭum 29 IS hmun pawimawhte an kap fuh tawh niin a sawi. IS ho motor pahnih an bomb chhiat sak bakah, Syria sipaite beihna tura bomb phurtu motor pawh an lo dang thei niin a sawi.

IS hian Sirte khaw chhunga mihring chenna bial eng emaw zat an la thunun a, mahse sipaite hian hma an sawn chak avangin firfiakte kut aṭanga an lak let thuai theih beisei a ni.