Thailand PM-in kum 2017-ah inthlanpui buatsaih tiam

Thailand Prime Minister Prayut Chan-o-cha chuan nakkum kum tawp lamah an ram inthlanpui buatsaih a nih tur thu a sawi.

Sipai kaihhruai sorkarin an ram danpui a siamṭhat chungchanga mipui ngaihdan lakah a duhtu lamah vote 61.35% a tla a, a duh lo lamah 58.07% a tla thung. Mipuiten danpui siamṭhat leh zawh belhna an siamte an thlawp avangin Constitution Drafting Committee (CDC) chuan danpui thar ruangam tur hi a siam dawn a, hei hi Constitutional Court in a enfiah hnuah an ram Lal hnenah a pawmpuina la turi thawn a ni leh dawn a ni. PM chuan thla thum chhungin buaipui ngaite hi an tifel thei dawn niin a tarlang.

Prayut chuan danpui siamṭhat chu pawm a nih hunah tuna an hman lailawk mek, 2014 interim constitution chu thlak nghal a ni ang a, CDC chuan organic law 10 siam turin hma a la nghal dawn tih a sawi. Organic law 10 zinga pali-te chu an ram inthlanpui neihna turah a pawimawh dawn a ni.

Thailand lal-in danpui siamṭhat hi a pawm hunah chuan an ram danpui 20-na tur a ni dawn a ni. He danpui siam thar hnuaiah hian sipai sorkarin a ruat, senator 250-te chuan lower member 500-te rualin prime minister an thlang ve thei tawh dawn a ni.

PM chuan an rama sipai kaihhruai sorkar ding mek chungchangah mi ṭhenkhat chu an lungawi lo niin an sawi a, heng mite hian an mimal hlawkna atan online media leh information hmangin an ram boruak chu tihchhiat an tum a ni, a ti. 2014 interim Constitution Article 44 chu hman a la ni reng tih sawiin, mipuite chu dan zah turin a ngen. Article 44 hian sipai hotu chu thil tih tur leh tih loh tur thupek chhuah chungchangah thuneihna a pe a ni.