Russia-in Aleppo-ah darkar thum inkahhai puang

Russia defence ministry chuan Sryia-a Aleppo khuaa beihpui a thlak mek chu khawpui chhunga chengte tana chhawmdawlna pekte lakluh a nih theih nan nimin aṭang khan nitin darkar thum chhung inkahhai a puang ṭhin dawn tih a sawi.

Russia army general staff Lieutenant General Sergei Rudskoy chuan, "Chhawmdawlna phurtu motor-te an luh theih nan nitin darkar thum chhung, zing dar 10 leh chawhnu dar 1 inkarah sipaiten ralthuam an chelek lo ang" a ti. Mahse UN chuan an hun hawn chhung hi a reilo a, khawpuia cheng mamawh lakluhna atan a rei lo lutuk niin a sawi thung.

Syria sorkar laka helte laka beihpui thlaknaah Russia sipaite hian an pui mek a, helho kuta awm Aleppo khuaah hian hun eng emaw chen beihpui thlak a ni tawh a, khawchhung mipuiten an tuar nasa tawh hle. Mipuite chuan ei leh in lam an tlachham ṭan tawh a, damdawi inenkawlna ṭha pawh a awm tawh lo nia sawi a ni.

UN agency chuan Aleppo khuaa cheng mi maktaduai hnih vel chuan ni li chhung an inah tui an herh haw thei tawh lo niin a sawi. Dar thum chhung leka mipuite mamawh phurh luh chu thil harsa tak a ni dawn a, darkar 48 tal hun hawnsak se an duh thu a tarlang.

Aleppo chhim thlang lama sipai leh helho inbeihna vangin ni lai kalta chhung khan mi 1,000 chuang an thi niin Rudskoy chuan a sawi a, mi 2,000 chuangin hliam an tuar bawk.